ليوم معادش فيها... بش نطرشق من جنابي!!
فديت، كليت، مليت وروحي طلعت من تونس ومن عبادها!!
تونس بلادي، نحبها ونموت عليها، ومنبدلها بحتى بلاد: لا فرنسا ولا كندا ولا إيطاليا ولا إسبانيا ولا تركيا ولا عمار بزور!!
أما تعبت، تعبت مالبهامة، تعبت مالتسطيكة، تعبت مالأنانية والنرجسية متع التوانسة!! يا اخي، موش خاطر إنت متعجبكش المعارضة معناتها هوما عباد موش نورمال و ميحبوش مصلحة لبلاد!! وللمعارضة: تي ماهو كي متعجبكش حاجة، انقد وأعطي حلول بديلة، أو ما يعبر عنه بالنقد البناء!!
وزادة موش خاطر نتومة تقولوا برواحكم مسلمين تكفروا غيركم وتعنفوهم وتزيدوا تحللوا دمهم!! و موش على خاطرني مانيش حاطة محرمة معناتها بيا وعليا!!
هاني رجعت نهز ونسبط!!! دمي يغلي في عروقي، واني نرى في حال لبلاد!! تي وين ماشين؟؟ وين؟؟ قولولي وين؟؟
والقروض هابطة كي التراب، هي قطر، هو اليابان، هو منعرفش شنوا!! والمستشارين والوزراء عاد!! قد شعر الراس!! وكل واحد إقولك ميسالش، منخذش شهرتي الكل!! قسموا خبزة الجاتو وقعدوا يتمزاو علينا!! بارك الله فيكم!!
وجماعة المجلس التأسيسي قعدوا كان اهزوا ويصبطو، تقشقيش حناك وحديث فارغ و زيد تطييح قدر، والرسمي اجيبوا ربي، والله المستعان!!
الحمد لله، مانيش من جملة البطالة، أهوكة نتلهى شوية في النهار، أما في الليل، لا مفر، الواحد يرجع يغلي!!
وراس أمي قريب تندموني على نهار 14 جانفي، تي عالقليلة قبل ماكناش نراو جماعة النقاب الاسود إلي منراو مهم شي وجماعة اللحية إلي نهار لكل عابسين قرنتهم، وين يراوك اقولوا "استغفر الله"، تقول شافوا إبليس!! يا أخي سهلها تسهال، وتبسم لدنيا تضحكلك، إرتاح طرف!!
والله لا فهمت هالبنات إلي حاطين نقاب وخارجين للشارع، كيفاش إخمموا، وهذا يعود للأسباب التالية:
- نحسك حاشمة (موش متع وجه يحمار) إلي جيت للدنيا أنثى، كان تلقى تفسخ روحك ولا تولي ترانسبارنت.
- توا بالله، عباد تعاني باش سي الراجل ما يتسلط عليك، ونتي تقلهم يا كفار ويا *****، تي بالله كان موش عاجبك، خلي لغيرك، إلي يعرف قيمة لحكايات هاذم.
- وأخيراً، وليس أخيراً، تي كي إنت تحب تولي ملك الراجل، تي ماهو شد دارك و رتحنا منك، تي إنت صوتك عورة، وإي مليمتر مربع من بدنك مثير للشهوة، وزيد ماكش بش تخدم وهكا ولا هكا بش تشد الدار تربي كمشة صغار، شد دارك من توا وسيبنا!!
والله قاعدين إتشوشو علينا، وموش مخلينا انركزو مع مصير البلاد إلي قاعد يتكتب توا!!
وكلمة أخرى بالله للجماعة المعتصمين: بالله شنوا تحبوا؟؟ خدمة؟؟ مفماش خدم توا توا!! دبر راسك دور الدولاب!! ويزي من التكعرير وتعطيل لعباد!! خلي الناس تمشي لخدمها، وإنت صبرت صبرت، زيد اصبر طرف، وما تأيسش، ومتحصرش روحك، أخرج من دومانك، من مدينتك، من بلادك!! أما بالله يزيونا من هالإعتصامات!! ماعملتوا بيهم شي، فلستوا الشركات إلي تحبوها تخدمكم وزدتوا في عدد البطالة إلي هوما خير منكم (عندهم خبرة سنين زايدة عليكم)
الحصيلوا وبرا، أختكم، كي التوانسة لكل، معادش مرتاحة، وراكبني العصب والستراس، نحب نهار نحل الفايسبوك ولا جريدة، ونقرا "السماء زرقاء والعصافير تزقزق" وموش بصيغة التنبير ولا التعتيم!!!
لحكاية هذي نعرفها حلمة بعيدة المنال، "utopie" كما إقولو الفرنسيس، أما زادة فما أطروحة الفوضى، إلي تقول إلي من الفوضى ينبع النظام، واني نحب نأمن بها!!
